Ung Nordisk Musik ‘27: Rewilding
Akureyri, Ísland
16.–21. ágúst
Ung Nordisk Musik (UNM) kallar eftir verkum á hátíð næsta árs sem mun fara fram á Akureyri dagana 16. - 21. ágúst 2027.
UNM er árleg samtímatónlistarhátíð á vegum ungra tónskálda á Norður- og Eystrasaltslöndunum. Hún hefur verið haldin samfleytt frá árinu 1946 og er ein elsta tónlistarhátíð sinnar tegundar í heimi. Hátíðin er einn mikilvægasti vettvangur tónskálda á svæðinu, 30 ára og yngri, þar sem þau kynna sig og sín verk, skiptast á hugmyndum og mynda ný sambönd.
Þema: Rewilding
Þema hátíðarinnar árið 2027 er Rewilding; að endurheimta náttúruleg grasrótarferli í listsköpun. Við viljum færa áhersluna af fastmótuðum kerfum í kringum listamanninn og sköpun yfir á lifandi vistkerfi listamanna. Markmiðið er að skapa rými þar sem einstaklingar styðja hver annan, eru opin fyrir því að deila verkfærum og útkomum og fagna saman þegar eitthvað nýtt eða spennandi kemur út úr því. Þannig lítur heilbrigt samfélag listamanna út að okkar mati; þetta er það sem við viljum leggja grunn að með UNM.
Umsókn um verk
Fimm verk frá hverju Norðurlandi og tvö verk frá hverju Eystrasaltsríki verða valin til þátttöku á hátíðinni. Hlutlaus dómnefnd í hverju landi sér um valið. Við hvetjum öll þau sem vinna með tónlist eða hljóð að hvaða leyti sem er að sækja um, hvort sem það er með kammerverk, sóló verk, innsetningar, margmiðlunarverk, tónlistar-leikhús, o.s.frv.. Áður en sótt er um er mikilvægt að kynna sér reglur og skilyrði kallsins, sem er að finna í umsóknarforminu.
Umsóknarform hátíðar
Auglýst eftir þátttakendum í listamannadvöl
Eins og síðustu ár mun listamannadvöl fara fram samhliða hátíðinni. Á næsta ári mun listamannadvölin fara fram vikuna fyrir hátíð, 9. - 15. ágúst 2027. Hún er haldin í Listasmiðjunni í Leifshúsum, staðsett á Svalbarðsströnd í Eyjafirði. Listamannadvölin er miðuð að tónskáldum sem eru einnig flytjendur; listamenn sem semja og flytja eigin verk. Þátttakendur munu skapa ný verk í dvölinni sem verða síðan frumflutt á hátíðinni, vikuna eftir á. Nánari upplýsingar um listamannadvölina má finna í umsóknarforminu.
Umsóknarform listamannadvalar